Mar 14 | WSK | STEP | Tom ilagala betemon asele Passover ko tom, se Bread Yeast Mena ko tom umutang kapurukko. Se priest bibiya, se Law Den ko kausa kari bibiya mu nuna lage bo, te Jesus tetela la ilumon ale momon se kuerukko wore ko iki gurugu se loagawakasan.

Mark 14

Kari bibiya Jesus momon se kuerukko ko den nungurman

(Mat 26: 1-5; Luke 22: 1-2; John 11: 45-53)

1 Tom ilagala betemon asele Passover ko tom, se Bread Yeast Mena ko tom umutang kapurukko. Se priest bibiya, se Law Den ko kausa kari bibiya mu nuna lage bo, te Jesus tetela la ilumon ale momon se kuerukko wore ko iki gurugu se loagawakasan. 2 Ale aking balman, “Ana mel imi Passover ko tom te me betenakko,” maman. “Kariimet kager patawomon bore ko,” maman.

Imet bo yu gureng siring yawara wore Jesus ko supuling te waram

(Mat 26: 6-13; John 12: 1-8)

3 Jesus Bethany wonong te kari kumik laera posara Simon mu ko kawam te na nowaram se imet bo yu kuting bo manga alabaster te nungurman ale yu gureng ko siring yawara mu ningi langiman mu giam ago tairam, ale yu kuting kuring kulukuam, ale yu gureng mu Jesus supuling te waram. Yu gureng mu mel bo “nard” masan mu te nungursan se ko koma kalel biya nunguningkiri.

4 Se kariimet saki munan umu aringiman ale nongomang magaram se nunumi manarukasan, “Awuk se mel owore yam ipi waru sapaman a?” makasan. 5 “Nuna mel mu diamon ale manga kalel biya nunguningkiri, manga silver 300 kiaram iwita, wore tamon kariimet nungumik mel mena te nunga sangarmonko ko mel wore!” Ale nuna imet mu ninguru ining tuikasan.

6 Bare Jesus nunga maonam, “Beteralko! Nina anape ko nu gomang ikup tusan? Nu munan ningo nunguningkiri wore ani angimik te beteram. 7 Kari nungumik mel mena mu tom suen biya nina nengerak bagomonko. Se nina nunga saongalko mu am nunga saongalko. Bare ani mu tom suen biya nina nengerak me bagirikko. 8 Mel imi nu bitirukko terong mam se beteram. Ani mutim ningi me aga betesan la, nu giram yu gureng angimik te waram ale aga nungam. 9 Ani nunguningta ninga manorsam, ali sor koma apareyate aninga den gilalong yawara balu se, bare imet imi mel beteram mu ko dugu duap agotala balmon se kariimet ikimon, ale agotala ko nungamin tugumonko.”

Judas nu Jesus kari bibiya nuguting te bitirukko balam

(Mat 26:14-16; Luke 22:3-6)

10 Asele olekem 12 mu nunga ningi bo, Judas Iscariot, mu nu priest bibiya nongote namaram ale Jesus kager kari nuguting te bitirukko mu ko arungu munakaram. 11 Se nuna noko den mu ikiman ale ko ninguru amilmilaman, ale manga nu tumonko balman. Se Judas peleram namaram, ale tom kuring bo aguwaya mu te nu Jesus kager kari nuguting te bitirukko mu ko ikia to se loaga guruguwakaso.

Jesus ko olekem arungu Passover na naman

(Mat 26:17-25; Luke 22:7-14; 21-23; John 13:21-30)

12 Bread Yeast Mena ko tom biya wore ko tom gira mu tai aratam, se tom mu Passover sipsip gotektek nunga momon se kuemonko tom. Se Jesus ko olekem nu isarman, “Ana kuwim aparete namanak ale Passover ko na yu nunguru saganakko ya?”

13 Se Jesus olekem ilagala nunga atumu iram ale nunga maonam, “Nina ilagala giral wonong biya ningi kasu nagural ale kari bo yu kuting biya mu te yu langiruk ale giok ago taiwuruk se arigal mu kowom kaoralko. 14 Ale kawam nu ningi kasu nagurok mu ko kotam aninga den imi maonalko, ‘Kari Biya iwita nika isarnakko balam, “Kawam naung ani olekem arungak Passover inang te nanakko mu apoko ya?” (mam,' butata maonalko.) 15 Se nu kuwim biya bo kualala nunguru beteman se ko daiga kuwim terong la, mu ninga kausok se arigalko. Ale kuwim umutang te anananga na yu nunguru se bagaralko.”

16 Se olekem ilagala mu namakasan, ale nama Jerusalem arataman, ale mel Jesus te nunga maonam butata la aringiman, ale eng te Passover na nungurman.

17 Se sor baingam tairam mu Jesus olekem 12 mu arungu tairam. 18 Ale dagiman na nowa se nu nunga maonam, “Ani nunguningta ninga manorsam, nenenga ningi kari bo ani kager kari nuguting te aga bitirukkowo. Nu ani agarak na nowoso.” ^{▼▼Mark 14:18 Psalm 41:9.}

19 Se olekem den mu ikiman ale ninguru nongomang batagakaso, se suwan suwan nu isarukasan, “Kari Biya, ani ye? Bare ani uwuta me bitirikkowo,” makasan.

20 Se Jesus nunga maonam, “Mu nina 12 ninga ningi bo ani agarak taiwir suwanta imi te bread kumin te ilu ilu nowoso borta ani kager kari nuguting te aga bitirukko. 21 Batoga te aniso iwitata, Kari ko Kuriang kumik te aratukko. Bare kari kager kari nuguting te nu bitirukko mu nu ikup yaman memek nunguningkiri taukkowo. Kari mu nuam tuagu ningi kueram la mu asele yawarakala ale.”

Jesus bread waen ago ko olekem alo nungaram se naman

(Mat 26:26-30; Luke 22:14-20; 1 Cor 11:23-25)

22 Nuna na nowaman se Jesus bread tam Kaem aru maonam, ale paogam ko olekem nungaru se balam, “Tal ale nalko. Imi aninga angimik nunguning.” 23 Ale aking yu waen bagunang ago mu tam Kaem aru maonam, ale nungaram, se nuna suen biya waen mu naman. 24 Nu nunga maonam, “Imi aninga angimik gue, kariimet suen biya nunga memek siwurokko warem se kaparam, se Kaem ko den (iru) nuna nogo ko nungam wore te sokel tuam. ^{▼▼Mark 14:24} 25 Ani nunguningta ninga manorsam, ani udagi yu waen me naik baga, Kaem ko kingdom ningi asele aking iru naikkowo.”

26 Ale wur bo ilu gilingiman ale barasaman Jerusalem beteman Duruk Olive te namaman.

Jesus olekem alo Peter karogo nubiring tumonko mu balam

(Mat 26:31-35; Luke 22:31-34; John 13:36-38)

27 Se Jesus nunga maonam, “Turom imitang te mu nina suen la nibiring ani aisal, ale parasaral naguralko. Mu awuk, batoga te iwita aniso:

‘Ani sipsip nunga bitua kari morik se kueruk,

se sipsip suen la parasomon ale nagu sapomonko.' ^{▼▼Mark 14:27 Zechariah 13:7.}
28 Bare ani kuerik ale barasik mu te ani girek Galilee namirik se nina umutang te nama agarak biguwuralko.”

29 Se Peter nu maonam, “Saki alo mu nika betemonko agi, bare ani agata mu mena nunguningkiri!”

30 Se Jesus Peter maonam, “Ani nunguningta ka manorsam, aitakta turom imitang te tarak tom ilagala ko me niaruk la, ni biring ani aisu ale tom ilagala suwan ko balu, ni ani ago ko me ikisam ma balukowo.”

31 Bare Peter nu den koma aora biya balukaso, “Ani nikerak kuerikko ta, bare ani ni me ka ikisam ma me balikko.” Se olekem suen la butata tala balukasan.

Jesus Gethsemane ai ngatangaram

(Mat 26:36-46; Luke 22:39-46)

32 Nuna nama sor kuwim bo Gethsemane masan mu te arataman, se Jesus ko olekem nunga maonam, “Nina imi te bagaral se ani namirik Kaem aru ngatangirikko.” 33 Ale nu Peter, James, John nunga giam se ilak namaman. Se nu ikup biya nunguningkiri iram se gomang kumik ikuwa kaparam. 34 Se nunga maonam, “Ani angamang bataga biyala se ko ikup aga iram se kuerikko iwita. Se nina imi te baga se marak sinar ago bagaralko,” mam.

35 Ale nu katirta aolak ilu namaram ale ali tuagu te dagulam ale Kaem ngatangarukaso, tom memek aratukko mu nu kiarukko mu ko balukaso. 36 “O Ba,” makaso, “ni mel suen biya bitarko terong maem. Se Ba, aninga angamang ni ikup yaman aninga irokko taiso ewere kutuwurko. Bare ni aninga ikia se angamang me karo tuiko, ni keta ka ikia se ka gemang mu la karo tuiko.”

37 Nu uwuta ngatangaram asele peleram tairam mu ko olekem ilagala suwan mu aniwaman se nungarkam ale ko nu Peter maonam, “Simon, ni aniwasam e? Ni tom katirta iwita ko sinar to se bagerko mu me terong e? 38 Nina sinar to se ai ngatanga sagaralko, ninga ira ariga bo tairuk se te dagulal bore ko. Nina aninga agiring karo tualko nengemang aniso, bare nina nengemang sokel aora biya mena.”

39 Ale akingtala peleram namaram ale maingkala ai ngatangaram turantala aking ai ngatangaram. 40 Ale peleram olekem nongote tairam mu olekem nomotam ikuwuram se akingtala aniwaman se nungarkam. Se nuna den bo balmonko mena.

41 Se nu akingtala namaram ale ngatangaram, ale peleram tairam mu nuna akingtala aniwaman se nungarkam, ale balam, “Nina am ani se neneman sapawasan e? Mu terong mam! Arigalko, tom aram! Aitak Kari ko Kuriang kari memek nuguting te betemonko. 42 Se barasal se namanakko! Arigalko, kari ani kager kari nuguting te aga bitirukko mu taiwoso!”

Judas nu Jesus kager kari nuguting te beteram

(Mat 26:47-56; Luke 22:47-53; John 18:3-12)

43 Jesus den imi am baluwaram la, olekem 12 nunga ningi bo Judas mu tai aratam. Se kari motam biya batir se tam mel giman ale nu ilak taiman. Priest bibiya, se Law Den ko kausa kari bibiya, se kari bibiya alo nunga awuman se tai gilingiman. 44 Judas nu maingkala iwita nunga maonam, “Ani kari bo iluwek ale kol te musuk maik, mu nina ikial mu kari borta. Se nina iluwal ninguru bitaru se ilak namaralko.”

45 Se nuna tai arataman mu Judas dirmam Jesus kote namaram ale auram, “Kari Biya!” mam, ale iluwam kol te musuk mam. 46 Se kari Judas ilak taiman mu kasuman Jesus iluman.

47 Se olekem bo ko batir woyam ale Priest Supuling ko ura kari bo te morukko negeram ale ko dogowa siluwuram.

48 Se Jesus nunga isuam, “Ani tere daong kari se aga iluwalko batir tam manga ago mu giman ago taiman e? 49 Ani tom suen biya temple ningi kariimet den nunga kasuruwakasam, se nina agarkikasan, bare nina tom mu te ani me aga ilukasan! Bare prophet girakala den balman wore ko nunguning te aratukko se mel imi iwitata aratoso.”

50 Se umutang te olekem suen la nu beteman ale naguman.

51 Se kari kulak bo guang sirar mu kataram ale Jesus kowom karowaram, se agotala ilumonko negeman, 52 bare ko guang la kutuwuman se nu nunguning la naguram.

Jesus Sanhedrin kari bibiya nomokete sanamaram

(Mat 26:57-68; Luke 22:54-55, 63-71; John 18:13-14, 19-24)

53 Se nuna Jesus diruwuman Priest Supuling mu kote ilak namaman. Se priest bibiya, se kari bibiya, se Law Den ko kausa kari suen biya tai biguwuman ale munakakasan. 54 Se Peter Jesus kowom kaoram namaram, bare nu awar nuam aolak ilu namakaso, ale Priest Supuling mu ko kawam ko kar ningi kaparam, ale kawam bitua kari arungu daigam ale tama kowar gi se bagakaso.

55 Se kawam ningi mu priest bibiya, se Sanhedrin ko kari bibiya suen la mu nuna Jesus kumik te den ikup bo aringimon ale te momon se kuerukko wore ko kari saki nunga aruman se taiman ko munakakasan. Bare den bo me aringiman. 56 Kari suen biya den kawel te Jesus atumukasan, bare nunga den koma suwanta mena, den ngual ngual balukasan. ^{▼▼Mark 14:56 Deuteronomy 17:6 se 19:15 arikko.}

57 Asele kari saki barasaman den kawel iwita Jesus te atumukasan: 58 “Nu iwita balam se ana ikiman, ‘Ani,’ mam, ‘temple imi kari nuguting te kaloman wore parasuwurik ale aking tom ilagala suwan te bo iru kalikkowo,’ makaso, ‘bare kari nuguting te kalosan iwita me kalikkowo,’ ma balukaso se ana ikiman,” makasan. ^{▼▼Mark 14:58 John 2:19-21.} 59 Bare nononga den iwita balukasan bare betela koma suwanta la mena.

60 Se Priest Supuling mu barasu gira sanamaram, ale Jesus isuam, “Ni kari kimik ko den balsan wore nunga den koma baluko mena e?” 61 Bare Jesus am kutek mam, ale den koma bo me balam.

Se Priest Supuling aking isa bo tuam, “Ni Kristus, Kaem nup patowasan wore ko Namar, agi mena?”

62 Se Jesus den koma balam, “Ani Kristus. ^{▼▼Mark 14:62 Greek den te “ego eimi” aniso, se ko nunguning mu “ani bagasam”: Exodus 3:14.} Se ani ninga manorsam, nina Kari ko Kuriang mu Kaem Sokel Ago mu ko kuting sengam mu te dagiwuruk se arigalko, ale aking peleruk taiti nuwi te tairuk se arigalko!” ^{▼▼Mark 14:62 Daniel 7:13.}

63 Se Priest Supuling den mu ikiam ale gomang ninguru magaram se ko guang barukuam ale balam, “Ana udagi kari saki nunga arunak se taimon kumik ko den saki karogo me balmonko! 64 Nina ikiman, nu Kaem balu maguwuram! Se nina awuk balsan a?”

Se nuna suen la Jesus ko iwita balman, “Nu memek ago, am kuerukko!” maman.

65 Se nunga ningi saki Jesus kumik kuali katingikasan. Ale ko motam guang mu biling te kaloman, ale moakasan ale isarukasan, “Awiri ka moso mu nup baluko!” makasan. Se kawam bitua kari taman ale moakasan.

Peter balam, “Ani Jesus me ko ikisam,” mam

(Mat 26:69-75; Luke 22:56-62; John 18:15-18, 25-27)

66 Se Peter kawam kar ningi aliti bagaram. Se Priest Supuling ko ura imet bo tairam, 67 ale Peter tama kowar giwaram se arigam, ale tai pingi ari se maonam, “Ni agotala Nazareth kari Jesus ilak geragakasam!” mam.

68 Bare Peter kawelaram ale balam, “Mena. Ani nika den balsam sumu me ko ikisam,” mam. Ale nu namaram kar ko songkuring ago sanamiwaram se tarak niaram.

69 Se ura imet nu mu te akingtala arigam ale kari sang pingi sanamingaman mu nunga manarukaso, “Kari imi nononga bo,” makaso.

70 Bare Peter akingtala kawelaram ale balam, “Mena!” mam.

Se kam me maiyam aking kari pingi sanamingaman mu Peter manarukasan, “Ni me kawelerko! Ni noko bo tala! Mu awuk, ni Galilee kari!”

71 Se Peter den sail karogotala balam, “Nunguningta nunguningkiri, ani kari nina balsan sumu me ko ikisam,” mam, “am mena biya nunguningkiri,” mam. “E ani kawelirik mu Kaem am aga morukko,” mam.

Se tairatela tarak bo aking niaram. Se Peter Jesus ko den nu maonam ale balam, “Tarak tom ilagala ko me niaruk la ni biring ani aisu ale tom ilagala suwan ko balu, ni ani me aga ikisam ma balukowo,” mam, mu kuamin te tairam. Se nu gomang biyala batagam se mononge kapakaso.

72